VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 5. FEBRÚAR 2026.
STUTTA ÚTGÁFAN
Gott uppgjör þar sem rekstrarhagnaður ársfjórðungsins var í samræmi við væntingar á meðan áætlun næsta árs var umfram væntingar AKKUR
Jákvætt:
Rekstrarkostnaður undir væntingum
Áætlun næstar árs umfram væntingar
Hófleg skuldsetning
Sterkt sjóðstreymi
Neikvætt:
Hagnaður lítillega undir væntingum
Festi birti uppgjör fyrir fjórða ársfjórðung 2025 fyrr í dag. EBITDA tímabilsins er í samræmi við væntingar AKKUR á meðan hagnaður er lítillega undir væntingum vegna hærri afskrifta og fjármagnskostnaðar en spá gerði ráð fyrir.
Hér að neðan má sjá samantekt á uppgjöri félagsins borið saman við spá AKKUR og fyrra ár.
Eins og sést á þessari samantekt eru tekjur undir væntingum sem og kostnaðarverð seldra vara og framlegð endar örlítið undir væntingum. Rekstrarkostnaður er undir væntingum og þ.a.l. EBITDA í samræmi við væntingar. Afskriftir eru yfir væntingum og er því EBIT og hagnaður lítillega undir væntingum.
Samanburður við fyrra ár sýnir að reksturinn er að batna töluvert á milli ára. Tekjur aukast um 7,2% og EBITDA um 43,9%. Leiðrétt fyrir stjórnvaldssekt á fjórða ársfjórðungi á fyrra ári eykst EBITDA um 14,8%.
Jákvæðir punktar
Rekstrarkostnaður var lítillega undir væntingum sem er jákvætt að sjá á tímum töluverðrar verðbólgu og launahækkana. Þetta skilar sér í því að EBITDA hlutfall er 30bps yfir væntingum.
Þar sem frumskýrsla um Festi er ennþá í vinnslu var ekki búið að birta formlega afkomuspá fyrir næstu ár. Mat AKKUR fyrir 2026 var í kringum 16,5makr í EBITDA fyrir árið 2026 og er ný áætlun því 250mkr yfir væntingum m.v. miðgildi.
Skuldsetning er hófleg og hefur aldrei verið lægri. Félagið skuldar núna 2x EBITDA og því töluvert svigrúm til staðar til að ráðast í frekari yfirtökur og/eða endurfjármagna efnahag og skila fjármunum til hluthafa. Markmið félagsins er að nettó skuldir séu undir 3,5x EBITDA.
Handbært fé frá rekstri eykst um 75% milli ára (fyrir árið í heild) og nam tæpum 16mökr. Fjárfestingar (brúttó) námu tæpum 6mökr og frjálst fjárflæði því tæplega 10makr.
Neikvæðir punktar
Hagnaður var lítillega undir væntingum og helgast af aðeins hærri afskriftum og hærri fjármagnskostnaði en gert var ráð fyrir. Hér er vert að benda á að í spá AKKUR er söluhagnaður vegna Malik færður undir afkomu hlutdeildarfélaga á meðan hann er færður í gegnum fjármunatekjur í uppgjöri Festi.
Niðurstaða
Gott uppgjör þar sem EBITDA er í samræmi við væntingar en áætlun fyrir 2026 er yfir væntingum. Hófleg skuldsetning og sterkt sjóðstreymi setur félagið í góða stöðu til frekari vaxtar eða að skila fjármunum til hluthafa.
Verðlagning
Miðað við dagslokagengi í dag er heildarvirði félagsins 138ma sem þýðir að það er metið á 8,6x EBITDA ársins 2025 eða 8,3x áætluð EBITDA ársins 2026 miðað við miðgildi áætlunar. EV/EBIT er 13,7x.
Myndin hér að neðan sýnir sögulega þróun á EV/EBITDA hlutfalli, aðlöguðu fyrir fjárfestingu í hlutdeildarfélögum, hlaupandi tólf mánuði frá sameiningu N1 og Festis árið 2018. Eins og sjá má hefur verðlagningin sjaldan verið hagstæðari á þann mælikvarða.
