VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 5. FEBRÚAR 2026.
STUTTA ÚTGÁFAN
Fjórði ársfjórðungur í samræmi við væntingar, slæmt ár að baki
Jákvætt:
Sjóðstreymi sterkt
Jákvæð þróun einingatekna
Jákvæð þróun í frakt- og leigustarfsemi
Neikvætt:
Kostnaðarhlutföll of há
Sterkt raungengi gerir félaginu erfitt fyrir
Engar formlegar horfur fyrir komandi ár
Icelandair birti uppgjör fyrir fjórða ársfjórðung 2025 fyrr í dag. Niðurstaðan er í grófum dráttum í samræmi við væntingar.
Hér að neðan má sjá samantekt á uppgjöri félagsin borið saman við spá AKKUR og fyrra ár.
Eins og sést á þessari samantekt eru flutningstekjur og leigutekjur í samræmi við væntingar á meðan aðrar rekstrartekjur eru lítillega yfir væntingum.
Rekstrarkostnaður var lítillega yfir væntingum, og á það við um alla liði rekstrarkostnaðar. Bæði EBITDA og EBIT eru rétt undir spá og að mestu leyti í samræmi við væntingar. Hærri fjármagnskostnaður gerir það svo að verkum að tap er lítillega umfram væntingar.
Jákvæðir punktar
Sjóðstreymi er sterkt og er handbært fé frá rekstri umfram væntingar.
Eftir að hafa lækkað á fyrri hluta ársins eru einingatekjur og meðalverð farin að hækka á seinni hluta ársins. Yield lækkaði milli ára í nánast hverjum mánuði þar til í júlí þegar það tók að hækka. Sjá mynd að neðan.
Á meðan rekstur leiðarkerfisins gengur illa þá var töluverður rekstrarbati á milli ára í frakt- og leigustarfsemi. Rekstrarhagnaður (EBIT) þessara eininga jókst um tæplega $7,5m milli ára.
Neikvæðir punktar
Kostnaðarhlutföll eru of há. Stöðugildum fjölgaði um 3% á milli ára en launakostnaður jókst um 20%. Launahlutfallið, launakostnaður sem hlutfall af tekjum, nam 30,6% á fjórðungnum samanborið við 29,5% fyrir ári síðan. Stærsta ástæðan er líklega veikari USD og ekki eitthvað sem félagið hefur stjórn á en leita þarf leiða til að hagræða.
Sögulega sterkt raungengi er að gera félaginu erfitt fyrir. Á meðan þróunin breytist ekki dregur úr samkeppnishæfni félagsins á alþjóðlegum mörkuðum, ásamt öðrum útflutningsfélögum.
Félagið gefur ekki út neinar horfur fyrir árið annað en að “afkoma á árinu 2026 batni á milli ára” og þess sem gert er ráð fyrir að þróun einingatekna verði umfram þróun einingakostnaðar. Það hefði verið ákjósanlegt að fá formlegar horfur en skiljanlegt í ljósi þess að kjaraviðræður standa yfir.
Niðurstaða
Uppgjör fjórðungsins var í samræmi við væntingar og líkur þar sem slæmu ári.
Verðmat AKKUR á Icelandair verður uppfært á næstu misserum ásamt afkomuspám fyrir komandi ár.
Verðlagning
Miðað við dagslokagengi í dag er markaðsvirði félagsins 32ma eða $265m. Heildarvirði félagsin er um 76ma eða $616m. Félagið er því metið á 3,9x EBITDA ársins 2025 og P/B 0,93x.