VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 12. FEBRÚAR 2026.
STUTTA ÚTGÁFAN
Gott uppgjör þar sem kjarnatekjur eru umfram væntingar
Jákvætt:
Þóknanatekjur langt umfram væntingar
Aðrar tekjur umfram væntingar
Bankinn hyggst skila 11% af markaðsvirði til hluthafa á næstu misserum
Neikvætt:
Rekstrarkostnaður yfir væntingum
Virðisrýrnun yfir væntingum
Íslandsbanki birti uppgjör fyrir fjórða ársfjórðung 2025 og árið í heild fyrr í dag. Hagnaður tímabilsins er undir væntingum AKKUR og litast af miklum rekstrarkostnaði. Kjarnatekjur eru umfram væntingar en undirliggjandi hagnaður undir væntingum.
Hér að neðan má sjá samantekt á uppgjöri bankans borið saman við spá AKKUR og meðaltal greiningaraðila.
Eins og sést á þessari samantekt eru hreinar vaxtatekjur í samræmi við væntingar á meðan þóknanatekjur eru langt umfram væntingar. Aðrar tekjur, þ.á.m. fjármunatekjur, eru yfir væntingum. Þetta skilar sér í því að kjarnatekjur eru umfram væntingar.
Rekstrarkostnaður er hins vegar langt yfir væntingum og þ.a.l. er undirliggjandi hagnaður undir væntingum AKKUR. Þar munar um 800m gjaldfærslu vegna snemmbúinna starfsloka, leiðrétt fyrir því var rekstrarkostnaður engu að síður yfir væntingum. Undirliggjandi hagnaður er engu að síður að batna milli ára og tólf mánaða takturinn í undirliggjandi hagnaði heldur áfram að aukast eins og sést að meðfylgjandi mynd.
Virðisrýrnun var yfir væntingum AKKUR en líkt og áður hefur komið fram er ekki reynt að spá sérstaklega fyrir um sveiflur hér og gert ráð fyrir að virðisrýrnun sé u.þ.b. 0,25% út spátímabilið á ári.
Jákvæðir punktar
Þóknanatekjur eru langt umfram væntingar. Ánægjulegt var að sjá að allar tekjulínur þóknana voru yfir væntingum sem skilaði sér í að þóknanatekjur voru tæplega milljarði yfir væntingum.
Aðrar tekjur voru umfram væntingar. Fjármunatekjur voru töluvert yfir væntingum eftir lélegt ár hingað til. Líkt og áður hefur komið fram er reynt að horfa framhjá sveiflum í fjármunatekjum og gert ráð fyrir að til lengri tíma sé afkoman jákvæð.
Bankinn er með heimild til endurkaupa upp á 15ma auk þess sem hann hyggst greiða um 13ma í arð í vor. Fyrirhuguð endurkaup og arðgreiðsla nema því 11% af markaðsvirði bankans.
Neikvæðir punktar
Rekstrakostnaður var langt umfram væntingar. Það litast að verulegu leyti að 800m gjaldfærslu vegna snemmbúinna starfsloka sem er einskiptisliður og mun bæta afkomu fram á veginn. Horft framhjá þessum einskiptislið er rekstrarkostnaður engu að síður umfram væntingar. Tilfærsla bankans á kostnaði milli rekstrarkostnaðar og þóknanakostnað á árinu litaði einnig spá AKKUR sem var einfaldlega of lág.
Virðisrýrnun var yfir væntingum. Eins og AKKUR hefur áður bent á er ekki ólíklegt að virðisrýrnun muni aukast tímabundið ef atvinnuleysi heldur áfram að aukast og/eða helst hátt.
Niðurstaða
Hagnaður tímabilsins var undir væntingum en þegar uppi er staðið er þetta gott uppgjör. Þegar horft er í gegnum einskiptisliði er það í samræmi við væntingar og bæting á milli ára.
Verðlagning
Miðað við dagslokagengi í dag er markaðsvirði bankans 222ma að teknu tilliti til eigin bréfa sem þýðir að hann er metinn á 9,8x hagnað ársins 2025 eða 9,3x hagnað ársins 2026 miðað við síðustu spá AKKUR. Á P/B mælikvarða er bankinn er metinn á 1,10x bókfært eigið fé.
Tvær myndir fá að fylgja sem sýna annars vegar þróun á V/H hlutfalli m.v. hlaupandi tólf mánaða hagnað og undirliggjandi hagnað fyrir skatta auk þess að sýna hvernig hlutföllin líta út fyrir 2026 m.v. spá AKKUR.
