VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 29. OKTÓBER 2025.
STUTTA ÚTGÁFAN
Kjarnarekstur umfram væntingar á þriðja ársfjórðungi
Jákvætt:
Vaxtatekjur umfram væntingar
Undirliggjandi hagnaður áfram sterkur
Neikvætt:
Afkoma trygginga langt undir væntingum
Arion banki birti uppgjör fyrir þriðja ársfjórðung 2025 fyrr í dag. Þrátt fyrir að hagnaður tímabilsins sé lítillega undir spá AKKUR er uppgjörið sterkt og góður gangur í undirliggjandi rekstri.
Hér að neðan má sjá samantekt á uppgjöri félagsins borið saman við spá AKKUR og meðaltal greiningaraðila.
Eins og sést á þessari samantekt eru hreinar vaxtatekjur töluvert yfir væntingum á meðan hreinar tekjur af tryggingum eru langt undir væntingum. Aðrir tekjuliðir eru í samræmi við væntingar. Rekstrarkostnaður var lítillega yfir væntingum.
Virðisbreyting var langt umfram væntingar en líkt og áður hefur komið fram er ekki reynt að spá fyrir um sveiflur í þessum lið en þess í stað gert ráð fyrir að virðisrýrnun sé í kringum 0,25% á ári út spátímabilið. Stærsti áhrifaþáttur á líkön bankanna er atvinnuleysi og ef það heldur áfram að aukast munum við líklega sjá tímabundna aukningu í virðisrýrnun.
Jákvæðir punktar
Hreinar vaxtatekjur eru töluvert umfram væntingar. Bæði var vaxtamunur hærri (3,33% vs 3,15%) og meiri vöxtur í lánabókar (2,3% vs 1,0%) en spá AKKUR gerði ráð fyrir.
Kjarnarekstur er sterkur og undirliggjandi hagnaður heldur áfram að aukast.
Neikvæðir punktar
Hreinar tekjur af tryggingum voru lang undir væntingum. Afkoman á sama ársfjórðungi í fyrra var lituð af einskiptislið þar sem verið var að færa niður eldri tjónaskuld. Engu að síður er afkoman á þessu ári um 500mkr undir afkomu síðasta árs leiðrétt fyrir því. Samsett hlutfall upp á 88,2% er engu að síður góð niðurstaða en væntingar voru miklar eftir sterkan rekstur undanfarið.
Niðurstaða
Þrátt fyrir að hagnaður tímabilsins hafi verið lítillega undir væntingum er uppgjörið sterkt. Þegar uppi er staðið er það lítillega umfram væntingar þar sem undirliggjandi hagnaður er töluvert umfram væntingar.
Verðlagning
Miðað við dagslokagengi í dag er markaðsvirði bankans 248ma að teknu tilliti til eigin bréfa. Hann er því metinn á 7,2x hagnað síðustu tólf mánaða eða 8,2x hagnað ársins 2026 skv. síðustu spá AKKUR. Á P/B mælikvarða er bankinn metinn á 1,18x bókfært eigið fé hluthafa bankans.
Tvær myndir fá að fylgja sem sýna annars vegar þróun á V/H hlutfalli m.v. hlaupandi tólf mánaða hagnað og undirliggjandi hagnað fyrir skatta auk þess að sýna hvernig hlutföllin líta út fyrir 2026 m.v. spá AKKUR.
