VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 30. OKTÓBER 2025.
STUTTA ÚTGÁFAN
Kjarnarekstur lítillega umfram væntingar á þriðja ársfjórðungi
Jákvætt:
Vaxtatekjur umfram væntingar
Rekstrarkostnaður undir væntingum
Umfram eigið fé ennþá um 43ma
Neikvætt:
Þóknanatekjur undir væntingum
Fjármunatekjur undir væntingum
Íslandsbanki birti uppgjör fyrir þriðja ársfjórðung 2025 fyrr í dag. Hagnaður tímabilsins er töluvert umfram væntingar AKKUR og litast af jákvæðri virðsirýrnun en undirliggjandi hagnaður sterkur og lítillega umfram væntingar.
Hér að neðan má sjá samantekt á uppgjöri bankans borið saman við spá AKKUR og meðaltal greiningaraðila.
Eins og sést á þessari samantekt eru hreinar vaxtatekjur umfram væntingar á meðan þóknanatekjur og fjármunatekjur eru undir væntingum. Þetta skilar sér í því að kjarnatekjur eru lítillega umfram væntingar þrátt fyrir varúðarfærslu vegna vaxtamálsins.
Rekstrarkostnaður er undir væntingum og þ.a.l. er undirliggjandi hagnaður yfir væntingum AKKUR. Tólf mánaða takturinn í undirliggjandi hagnaði heldur áfram að aukast eins og sést að meðfylgjandi mynd.
Hrein virðisbreyting var langt undir væntingum AKKUR en líkt og áður hefur komið fram er ekki reynt að spá sérstaklega fyrir um sveiflur hér og gert ráð fyrir að virðisrýrnun sé u.þ.b. 0,25% út spátímabilið á ári.
Jákvæðir punktar
Hreinar vaxtatekjur eru umfram væntingar. Vaxtamunur var yfir væntingum á meðan vöxtur lánabókar var lítillega undir væntingum. Vaxtamunurinn var sérstaklega sterkur þegar tekið er tillit til þess að bankinn gjaldfærði 550mkr vegna vaxtamálsins sem varúðarniðurfærslu en ekki er ljóst ennþá hvort komi til nokkurra greiðslna. Leiðrétt fyrir þessari varúðarfærslu var vaxtamunurinn 13bps hærri eða rúmlega 3,2%.
Rekstrarkostnaður um 300m undir væntingum. Launakostnaður er nánast óbreyttur milli ára á meðan annar rekstrarkostnaður eykst um 3,9% leiðrétt fyrir stjórnvaldssekt á fyrra ári. Heildarrekstrarkostnaður eykst aðeins um 1,7% milli ára og bankinn greinilega með góð tök á kostnaði.
Umfram eigið fé um 43ma eða sem nemur tæplega 20% af markaðsvirði bankans. Samkvæmt útreikningum AKKUR getur bankinn ennþá keypt eigin bréf fyrir tæplega 10ma skv gildandi heimild eða rúmlega 4% af markaðsvirði.
Neikvæðir punktar
Hreinar þóknanatekjur voru töluvert undir væntingum eða um 7%. Mestu munar hér um lægri þóknanir í fjárfestingabankastarfsemi og greiðslumiðlun miðað við væntingar AKKUR.
Fjármunatekjur eru undir væntingum. Það er ekki í fyrsta sinn en eins og áður hefur komið fram kýs AKKUR að horfa framhjá þessum sveiflukennda lið að ákveðnu leiti. Hér þarf t.d. að hafa í huga að áhrif af skiptasamningum sem bankinn gerir til að verja sig fyrir vaxtaáhættu koma t.a.m. fram hér en ekki í gegnum vaxtatekjur.
Niðurstaða
Sterkt uppgjör þar sem hagnaður tímabilsins var yfir væntingum. Þegar horft er í gegnum sveiflukennda liði má sjá að undirliggjandi hagnaður var lítillega umfram væntingar.
Verðlagning
Miðað við dagslokagengi í dag er markaðsvirði bankans 222ma að teknu tilliti til eigin bréfa sem þýðir að hann er metinn á 8,8x hagnað síðustu tólf mánaða eða 8,3x hagnað ársins 2026 miðað við síðustu spá AKKUR. Á P/B mælikvarða er bankinn er metinn á 0,98x bókfært eigið fé.
Tvær myndir fá að fylgja sem sýna annars vegar þróun á V/H hlutfalli m.v. hlaupandi tólf mánaða hagnað og undirliggjandi hagnað fyrir skatta auk þess að sýna hvernig hlutföllin líta út fyrir 2026 m.v. spá AKKUR.
