VIÐBRÖGÐIN VORU SEND TIL ÁSKRIFENDA Í KJÖLFAR UPPGJÖRS OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 30. OKTÓBER 2025.
STUTTA ÚTGÁFAN
Tekjur sterkar en afkoma töluvert undir væntingum
Jákvætt:
Tekjuvöxtur áfram sterkur
Neikvætt:
Kostnaður yfir væntingum
EBITDA áætlun ársins færð niður
Nova birti uppgjör fyrir þriðja ársfjórðung 2025 fyrr í dag. Uppgjörið er ekki gott og töluvert undir væntingum.
Hér að neðan má sjá samantekt á uppgjöri félagsins borið saman við spá AKKUR.
Eins og sést á þessari samantekt eru tekjur í samræmi við væntingar á meðan allur kostnaður er yfir væntingum og þar af leiðandi er EBITDA, EBIT og hagnaður töluvert undir væntingum AKKUR.
Eftir dágóðan tíma þar sem hlaupandi tólf mánaða rekstrarhagnaður og sjóðsstreymi batna með hverjum fjórðungi lækkar takturinn núna. Félagið er að einhvejru leiti fórnarlamb eigin velgengni þar sem mikill afkomubati hefur átt sér stað undanfarið og því væntingar orðnar (of) miklar.
Jákvæðir punktar
Það er áfram sterkur tekjuvöxtur sem endurspeglast í að tekjur eru í samræmi við væntingar. Tekjur aukast um 3,7% milli ára og fátt sem kemur á óvart þar.
Neikvæðir punktar
Allir kostnaðarliðir voru yfir væntingum sem skilar sér í að EBITDA, EBIT og hagnaður er undir væntingum. Undanfarna fjórðunga hefur rekstrarkostnaður verið að aukast um 2-3% milli ára en eykst núna um tæp 10%! Vissulega er tekið fram að verið sé að gjaldfæra ákveðin kostnað fyrr á þessu ári en áður og því ætti þetta að jafnast út að einhverju leyti á næsta fjórðungi. Sé leiðrétt fyrir þessu eykst rekstrarkostnaður engu að síður um tæp 9% milli ára.
Áætlun ársins er í raun færð niður þar sem efri mörk EBITDA áætlunar eru færð niður um 200mkr. Spá AKKUR fyrir árið gerði ráð fyrir að EBITDA ársins yrði rétt yfir áður útgefnum efri mörkum, eða tæplega 4,5ma, eftir sterkan fyrri hluta árs en ljóst að það var ofmat.
Niðurstaða
Ekki gott uppgjör sem var töluvert undir væntingum. Reksturinn er hins vegar á réttri leið en ákveðið bakslag átti sér stað á liðnum fjórðungi þegar kemur að kostnaði. AKKUR mun bíða eftir ársuppgjöri áður en afkomuspár næstu ára verða endurskoðaðar en líklegra að þær verði endurskoðaðar niður á við frekar en hitt.
Verðlagning
Miðað við dagslokagengi í dag er markaðsvirði félagsins 17ma. að teknu tilliti til eigin bréfa, og heildarvirði rúmlega 28ma. EV/EBITDA síðustu tólf mánaða og miðað við uppfærðar horfur er því 6,7x. EV/EBIT síðustu 12 mánaða er 15,8x og P/E 21,8x.
