VIÐBRÖGÐIN VORU SEND TIL ÁSKRIFENDA Í GÆRKVÖLDI OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 31. JÚLÍ 2025.
Jákvætt:
Vaxtatekjur töluvert umfram væntingar
Þóknanatekjur töluvert umfram væntingar
Rekstrarkostnaður undir væntingum
Umfram eigið fé ennþá um 40ma
Neikvætt:
Virkt skatthlutfall mjög hátt og umfram væntingar
Íslandsbanki birti uppgjör fyrir annan ársfjórðung 2025 fyrr í dag. Niðurstaðan er töluvert umfram væntingar AKKUR og undirliggjandi rekstur er mjög sterkur.
Hér að neðan má sjá samantekt á uppgjöri bankans borið saman við spá AKKUR og meðaltal greiningaraðila.
Eins og sést á þessari samantekt eru allir tekjuliðir umfram væntingar AKKUR. Minni áhersla er lögð á sveiflukenndu liðina hreinar fjármunatekjur og aðrar tekjur en kjarnatekjur eru tæplega 6% yfir væntingum AKKUR.
Rekstrarkostnaður er undir væntingum og þ.a.l. er undirliggjandi hagnaður töluvert yfir væntingum AKKUR, eða 13%. Þetta var besti ársfjórðungur bankans þegar kemur að undirliggjandi hagnaði og er 12 mánaða takturinn að taka vel við sér eins og sést að meðfylgjandi mynd.
Hrein virðisbreyting var einnig langt undir væntingum AKKUR en líkt og áður hefur komið fram er ekki reynt að spá sérstaklega fyrir um sveiflur hér og gert ráð fyrir að virðisrýrnun sé u.þ.b. 0,25% út spátímabilið á ári.
Jákvæðir punktar
Hreinar vaxtatekjur eru töluvert umfram væntingar. Vaxtamunur var yfir væntingum og vöxtur lánabókar umfram væntingar. Hreinar vaxtatekjur á einum ársfjórðungi hafa aldrei verið hærri og vaxtamunurinn líklega sá mesti í sögu bankans. Markaðurinn hefur haft áhyggjur af vaxtamun og að hann muni minnka með lækkandi verðbólgu en síðasti ársfjórðungur var mjög sterkur. Líkt og bent var á í viðbrögðum við uppgjöri Arion banka er vert að benda á frumvarp um kílómetragjald og hvaða áhrif það getur haft á vísitölu neysluverðs sem verður skoðað betur síðar.
Hreinar þóknanatekjur voru töluvert umfram væntingar AKKUR. Mestu munaði um tekjur af fjárfestingabankastarfsemi voru tölvert yfir væntingum AKKUR og verður fróðlegt að sjá hvort sú þróun haldi áfram.
Rekstrarkostnaður um 270m undir væntingum. Launakostnaður eykst um 6,8% milli ára á meðan annar rekstrarkostnaður dregst saman um 2,3% leiðrétt fyrir stjórnvaldssekt á fyrra ári. Heildarrekstrarkostnaður eykst aðeins um 3,1% milli ára leiðrétt fyrir sekt.
Umfram eigið fé um 40ma eða sem nemur tæplega 17% af markaðsvirði bankans. Núverandi endurkaupaáætlun nemur allt að 15mö eða rúmlega 6% af markaðsvirði bankans. Endurkaupin munu styðja við gengisþróun næstu misseri.
Neikvæðir punktar
Virkt skatthlutfall var mjög hátt á fjórðungnum, líkt og þeim síðasta, eða um 30%. Óhagstæð samsetning hagnaðar (skattalega) gerir það að verkum að skatthlutfall verður mjög hátt. AKKUR kýs hins vegar að dvelja ekki of mikið við þetta þar sem líkt og með fjármunatekjur jafnast þetta út yfir lengri tíma.
Niðurstaða
Sterkt uppgjör sem var töluvert umfram væntingar. Það er ljóst að AKKUR mun endurskoða horfur núverandi árs upp á við þar sem að undirliggjandi rekstur er sterkari en gert var ráð fyrir.
Verðlagning
Miðað við dagslokagengi í dag er markaðsvirði bankans 236ma að teknu tilliti til eigin bréfa sem þýðir að hann er metinn á 9,2x hagnað síðustu tólf mánaða eða 9,5x hagnað ársins 2025 miðað við síðustu spá AKKUR og P/B hlutfallið 1,05x. Í ljósi þess að afkoma á fyrri hluta ársins var töluvert umfram væntingar eru miklar líkur á að spá AKKUR fyrir 2025 verði hækkuð.