Hér að neðan má finna samantekt sem sýnir afkomuspár fyrir þriðja ársfjórðung hjá þeim félögum sem AKKUR fylgist með.

Afkomuspárnar voru gefna út til áskrifenda mánudaginn 13. október, áður en Icelandair birti afkomuviðvörun.

Viðbrögð við afkomuviðvörun voru send til áskrifenda síðar sama dag en eru látin fylgja hér með afkomuspám. Textinn hér að neðan er óbreyttur og ber að hafa í huga að hann var sendur til áskrifenda miðvikudaginn 15. október.

Icelandair birtu afkomuviðvörun fyrr í dag þar sem fram kemur að EBIT þriðja ársfjórðungs verður í kringum $74m samanborið við $83,5m á sama tíma fyrir ári.

Í uppgjöri annars ársfjórðungs gáfu stjórnendur til kynna að afkoma þriðja ársfjórðungs yrði betri en á sama tíma og í fyrra og er afkoman því töluvert undir væntingum stjórnenda.

Afkomuspá AKKUR gerði hins vegar ráð fyrir því að EBIT yrði $80m og er afkoman því undir væntingum en þó töluvert minni munur en borið saman við væntingar stjórnenda.

Afkomuspá AKKUR, sem var hluti af Ársfjórðungssamantekt sem send var á mánudagsmorgun, er sett hér að neðan til glöggvunar.

Eins og sést er EBIT á Q3 um 7,5% undir væntingum, eða um $6m, sem er svosem innan skekkjumarka í jafnsveiflukenndum rekstri og flugrekstur er.

Það sem verra er, að mati AKKUR, er að vænt EBIT á Q4 stefnir í að vera neikvætt um $23-33m sem er svipað og á sama tímabili í fyrra sem var mjög lélegur fjórðungur.

AKKUR hafði gert ráð fyrir því að með falli Play myndi Q4 jafnvel verða aðeins betri en vonir stjórnenda stóðu til eftir uppgjör annars ársfjórðungs. Síðustu sætin í ferðunum skila að jafnaði mestu framlegðinni og það hefði mátt sjá fyrir sér að með falli Play myndu mörg flug fyllast á háum meðalverðum með litlum jaðarkostnaði á næstu vikum/mánuðum.

Það lítur því út fyrir að árið í heild verði $10-20m undir væntingum og útlit fyrir að biðin eftir batnandi rekstri sé að lengjast. Það er því líklegt að afkomuhorfur næsta árs verði færðar niður við næstu endurskoðun.

Þessu til viðbótar er mögulega yfirvofandi vinnustöðvun hjá flugumferðarstjórum auk þess sem kjarasamningar flugmanna og flugliða eru útrunnir.