ÞESSI PÓSTUR VAR SENDUR TIL ÁSKRIFENDA AÐ KVÖLDI 28. DESEMBER OG ER NÚ BIRTUR OPINBERLEGA
Arion banki og Kvika tilkynntu um fyrirhuguð endurkaup á eigin bréfum, með fyrirvara um samþykki Fjármálaeftirlits Seðlabanka Íslands, eftir lokun markaða á Þorláksmessu.
Fjárhæð endurkaupanna nemur 5,0mö hjá Arion banka og tæplega 1,8mö hjá Kvika sem eru sömu hlutföll og skiptahlutföllin sem samið var um í samrunaviðræðum. Endurkaupin koma því ekki til með að hafa áhrif á fyrirhuguð skiptahlutföll.
Að mati AKKUR er þetta kærkomin viðbót fyrir markaðinn og hluthafa bankanna en að sama skapi löngu tímabært. Það er skiljanlegt að stjórnir bankanna hafi hætt endurkaupum til að byrja með eftir að samrunaviðræður fóru af stað en það lá alltaf fyrir að ferlið myndi taka langan tíma. Það hefði því ekki verið skynsamlegt að ætla alfarið að hætta endurkaupum þar til ferlið væri á enda.
Vonandi munu endurkaupin halda áfram, á meðan samrunaviðræður eru í gangi er þá hægt að stilla þau af útfrá skiptahlutföllum eins og gert var í þetta skipti. Umfram eigið fé* bankanna er í dag um 27ma hjá Arion banka og 13ma hjá Kviku skv. útreikningum AKKUR. Á sama tíma halda bankarnir áfram að hagnast og umfram eigið fé eykst því á meðan bankarnir eru ekki í endurkaupum.
*Eigið fé þáttar 1 (CET1) að meðtöldum fyrirhuguðum arðgreiðslum/endurkaupum, óendurskoðuðum hagnaði og eftir innleiðingu CRR3.
Hlutfallsleg verðlagning Arion og Kviku
Í ljósi þess að stjórnir bankanna hafa samið um skiptahlutföll er áhugavert að skoða hlutfallslega verðlagningu Arion banka og Kviku. Hluthafar Kviku eiga að eignast 26% í sameinuðu félagi en miðað við verðlagningu félaganna á markaði í dag er markaðsvirði Kviku aðeins 22% af samanlögðu virði félaganna.
M.v. skiptahlutföllin ætti gengi Kviku að vera u.þ.b. 21,5kr á hlut ef fjárfestir trúir því að samruninn klárist með óbreyttum forsendum. Það þýðir að afslátturinn frá skiptagengi er í dag tæplega 20% og heldur aldrei verið meiri.
Þróun á gengi Arion banka og Kviku ásamt fólgnum afslætti miðað við skiptagengi
Það er eðlilegt og alþekkt að það sé afsláttur (e.. merger spread) frá samrunagengi frá tilkynningu og þar til samruni klárast, ef hann klárast. Afslátturinn er tilkominn annars vegar vegna óvissu um að viðskiptin gangi í gegn (e. deal risk) og þar sem núvirða þarf andvirðið þar sem þetta er framtíðargreiðsla. Það mætti túlka þessu þróun á þann veg að trú markaðsaðila á því að samruninn fari óbreyttur í gegn sé stöðugt að minnka.
Uppfærð verðmöt
Til upprifjunar uppfærði AKKUR verðmat á bönkunum þremur í lok nóvember sl. og má sjá uppfærslurnar hér að neðan.
