Arion banki vill sameinast Kviku

VIÐBRÖGÐIN VORU SEND TIL ÁSKRIFENDA ÞRIÐJUDAGSKVÖLD 27. MAÍ OG ERU BIRT OPINBERLEGA NÚNA

Eftir lokun markaða þriðjudaginn 27. maí lýsti Arion banki yfir áhuga sínum að ganga til viðræðna við Kviku banka um samruna bankanna tveggja.

Hér að neðan má sjá fyrstu viðbrögð AKKUR við fréttunum en við má búast að það verði meiri umfjöllun á næstunni.

Líklegt verður að teljast að Samkeppniseftirlitið (SKE) muni ekki heimila samrunann í óbreyttri mynd og væri þá helst verið að horfa til þess að sameinaður banki væri langstærstur á eingastýringarmarkaði. Það er því ansi líklegt að bankarnir þyrftu að skuldbinda sig til að selja frá sér Kviku eignastýringu ef til samruna kemur. Stóra spurningin er hvort það sé nóg eða hvort að SKE vilji undanskilja fleiri hluta rekstursins.

Hér að neðan verður horft framhjá þessum pælingum að svo stöddu og gert ráð fyrir sameiningu bankanna eins og þeir líta út í dag. Reynt verður að draga upp einhverjar aðrar sviðsmyndir þar sem eignastýringin væri t.d. seld síðar.

Svipaður fjöldi starfaði hjá stóru bönkunum þremur, Arion banka, Íslandsbanka og Landsbankanum, á árinu 2024 eða í kringum 800 hjá hverjum og einum. Þrátt fyrir að Landsbankinn sé með um þriðjungi stærri efnahagsreikning en Arion banki voru færri stöðugildi hjá Landsbankanum en Arion banka, eða 811 samanborið við 836.

Það ber að hafa í huga að töluverður fjöldi starfar hjá Verði og starfsmannafjöldi Landsbankans mun aukast töluvert með innkomu TM eða um u.þ.b. 100 stöðugildi. Þess fyrir utan getur verið munur milli bankanna hvort ákveðnum starfsþáttum sé úthýst o.s.frv.

Engu að síður segir þetta manni að það séu töluverð tækifæri til hagræðingar í rekstrinum. Kvika var með 247 starfsgildi á síðasta ári og ef við horfum framhjá öllum hugleiðingum um að mögulega þurfti að selja einhverja starfsemi burt væri sameinaður banki með 1.083 starfsgildi.

Ef við horfum á að Landsbankinn, með sína töluvert stærri starfsemi, mun vera með í kringum 900 starfsgildi eftir yfirtökuna á TM má færa rök fyrir því að sameinaður Arion banki og Kvika ætti að vera með það sem markmið að vera með færri starfsgildi en Landsbankinn með TM innanborðs.

Það myndi þýða fækkun stöðugilda um 180-190 sem er ansi mikið þegar það er sett í samhengi við að heildarfjöldi stöðugilda Kviku er tæplega 250 en alls ekki óraunhæft.

Til þess að hafa vaðið fyrir neðan okkur skulum við segja að raunhæft sé að fækka stöðugildum um 150 sem þýðir sparnað upp á u.þ.b. 3,5makr.

Fyrir utan launakostnað voru Arion banki og Kvika með samanlagt 16,6makr. í annan rekstrarkostnað (fyrir utan stjórnvaldssektir) á árinu 2024. Kvika birtir því miður ekki mikla sundurliðun á þessum rekstrarkostnaði en ætla má að hægt væri að skera niður hér um a.m.k. 2,5makr., sem er um 15% lækkun, án mikilla vandkvæða. Þá væri sameinaður banki með annan rekstrarkostnað per starfsgildi á svipuðum stað og hjá Arion banka fyrir sameiningu.

Heildarsamlegð á kostnaðarhlið gæti því numið í kringum 6ma.kr. á ári miðað við ofangreint.

Ef við berum saman nýjustu erlendu skuldabréfaútgáfur bankanna tveggja er Arion banki að fá betri kjör sem nemur á bilinu 80-120bps. Arion banki gaf út í dag, þriðjudaginn 27. maí, skuldabréf í sænskum og norskum krónum á 117-120bps álagi á millibankavexti á meðan síðasta útgáfa Kviku í sænskum og norskum krónum var á 200bps álagi.

Kvika gaf út skuldabréf í Evrum fyrir helgi á 250bps álagi á millibankavexti á meðan síðasta útgáfa hjá Arion banka var á 130bps álagi. Ef við horfum bara á þessar síðustu útgáfur er munurinn 80-120bps eins og áður kom fram.

Ef við gerum ráð fyrir að sameinaður banki geti fjármagnað sig á 100bps betri kjörum á erlendum útgáfum en Kvika í gerir í dag þýðir það 650mkr. samlegð í fjármögnunarkostnaði á erlendar skuldir Kviku.

Það sem vantar inn í þetta, og er erfiðara að leggja mat á, er að sameinaður banki mun vonandi ná að fjármagna sig á betri kjörum en Arion banki gerir einn og sér í dag. Hver 10bps lækkun í fjármögnunarkjörum hjá sameinuðum banka gæti skilað u.þ.b. 300mkr. í bætta afkomu.

Eins og AKKUR hefur áður komið inn á í viðtölum, t.d. hér, er það met AKKUR að breska starfsemi Kviku geti blómstrað inni í stærri samstæðu eins og Arion banka.

Það eru fyrst og fremst tvær ástæður. Annars vegar sú að Arion banki gæti fjármagnað útlánastarfsemi Ortus á mun betri kjörum og náð þannig ennþá meiri vaxtamun út úr starfseminni. Hins vegar verður lánastarfsemin í Bretlandi alltaf takmörkuð við heildarstærð samstæðunnar, þ.e.a.s. hún má ekki verða of stór hluti, og með því að vera hluti af stærri samstæðu eru tækifæri til að vaxa ennþá hraðar.

Hér að neðan má sjá mjög gróf drög að því hvernig sameinaður banki gæti litið út miðað við spá AKKUR fyrir árið 2025 og mati á samlegð. Þetta er byggt á afkomuspá AKKUR fyrir árið 2025 sem gefin var út fyrir uppgjör fyrsta ársfjórðungs og á eftir að endurskoða.

Hér er ekki búið að taka tillit til þess að mögulega þyrftu bankarnir að selja einhverja starfsemi frá sér sem gæti breytt myndinni að einhverju leyti.

Það má færa rök fyrir því að það getur komið fram “neikvæð samlegð” í þóknanatekjum. Sem dæmi geta þóknanatekjur í verðbréfamiðlun og fyrirtækjaráðgjöf dregist saman í sameinuðum banka t.d. þar sem viðskiptin þar eru meira bundnar við starfsfólkið heldur en t.d. lánastarfsemi.

Sameinaður banki er klárlega meira virði heldur í sitthvoru lagi. Það er því hluthöfum beggja banka til hagsbóta að samruninn eigi sér stað. Báðir bankar eru undirverðlagðir að mati AKKUR en þar sem hluthafar Kviku fengju að fullu greitt með hlutabréfum í Arion banka fengju þeir líka að njóta ábatans.

Miðað við hluthafalista bankanna í dag yrði ekki mikil breyting á samsetningu hluthafahópsins þar stærstu hluthafar beggja banka eru mikið til sömu aðilarnir.

Miðað við V/H margfaldara 9,0x og ofangreindar forsendur um samlegðartækifæri er virðisaukningin í kringum 60makr. sem væri að mestu leyti að renna til lífeyrissjóða sem eru langstærstu hluthafar beggja banka.

Hér að neðan má sjá hvernig hluthafalisti sameinaðs banka gæti litið nokkurn veginn út miðað við stöðu þeirra í dag byggt á nýjustu upplýsingum um hluthafa á heimasíðum bankanna.

AKKUR telur góðar líkur á að samruninn fái fram að ganga en óvissan snýr að tímalínu og hvaða skilyrðum samruninn yrði háður. Mögulega þyrfti sameinaður banki að selja frá sér einhvern hluta starfseminnar, augljósa málið er eignastýring en stóra spurningin er hvort SKE fetti fingur út í fleiri atriði.