Seðlabanki Íslands birti nýjustu tölur fyrir verðbréfa-, fjárfestingar- og fagfjárfestasjóði í gær sem ná yfir janúar síðastliðinn. Í janúar var nettó innflæði í verðbréfa- og fjárfestingarsjóði upp á rúmlega 9ma.kr. og þar af var mesta innflæðið í peningamarkaðssjóði eða tæpir 5ma.kr.
Nettó innflæði í hlutabréfasjóði nam rúmlega 1.300m.kr. sem gerði það að verkum að í fyrsta sinn síðan í ágúst 2021 hefur núna verið nettó innflæði í hlutabréfasjóði fimm mánuði í röð.
Eins og sést á ofangreindri mynd eru nettó kaup síðustu 12 mánuði ennþá mjög lítil í sögulegu samhengi og frá innrás Rússa í Úkraínu (febrúar 2022) er uppsafnað útflæði ennþá 16ma.kr.
Einnig voru birtar tölur fyrir bankakerfið í janúar fyrir stuttu og það er áhugavert að fylgjast með þróun innlána heimilanna. Innlán heimila jukust um 28ma.kr. í janúar. Síðustu 12 mánuði hafa innlán heimila aukist um 273ma.kr. en til samanburðar er markaðsvirði Arion banka og Íslandsbanka u.þ.b. 230ma.kr. hvor.
Innlán heimilanna námu í lok nóvember rúmlega 1.720mö.kr. eða rúmlega 50% af markaðsvirði allra félaganna í kauphöllinni!
Áhugavert er að setja innlán heimilanna í samhengi við eign heimilanna í sjóðum sem er hægt að lesa út úr tölum Seðlabankans. Þar má sjá að eign heimilanna í verðbréfa- og fjárfestingarsjóðum er nánast í sögulegu lágmarki eins langt aftur tölurnar ná.
Ef við horfum bara á eign heimilanna í hlutabréfasjóðum hefur hlutfallið aðeins aukist undanfarna mánuði en engu að síður lágt í sögulegu samhengi.
Stóra spurningin er hversu mikið vextir munu þurfa að lækka til viðbótar áður en innlán heimilanna fara að leita í meiri mæli í verðbréfafjárfestingar.