Íslandsbanki og Skagi í samrunaviðræður

Íslandsbanki og Skagi tilkynntu sl. nótt um að stjórnir félaganna hefðu komist að samkomulagi um að hefja formlegar samrunaviðræður milli félaganna. Hluthafar Skaga munu eignast tæplega 324m nýja hluti í Íslandsbanka í skiptum fyrir hlut sinn í Skaga og munu þannig eiga u.þ.b. 15% hlutafjár í sameinuðu félagi.

Það fyrsta sem vert er að benda á er að þetta er samruni þar sem endurgjald Íslandsbanka er að fullu með hlutabréfum í bankanum og hefur því ekki áhrif á umfram eigið fé bankans sem verður áfram gríðarlegt.

Þar sem AKKUR hefur ekki gefið út Frumskýrslu um Skaga eru neðangreindar tölur settar fram með þeim fyrirvara að þær eru ekki settar fram af jafn ígrunduðu máli og tölur Íslandsbanka.

Hér að neðan má sjá fyrsta mat á því hvernig sameinað félag gæti litið út, með og án samlegðar og V/H margfaldara fyrir hvert ár.

Í mati AKKUR fyrir 2025 er gert ráð fyrir kostnaði vegna samrunaviðræðna upp á 200mkr. Nú er langt liðið á árið og líklegt að hluti kostnaðar muni falla til árið 2026 en til einföldunar er gert ráð fyrir að hann falli allur til á þessu ári.

Í mati AKKUR fyrir 2026 er gert ráð fyrir “neikvæðri samlegð” í þóknanatekjum upp á 500mkr en þetta er mat á töpuðum þóknanatekjum hjá sameinuðu félagi. Ekki er gert ráð fyrir kostnaðarsamlegð á árinu þar sem líklega fer samruninn ekki í gegn fyrr en seinni hluta ársins og einhver kostnaður myndi fylgja mögulegum hagræðingaraðgerðum.

Í mati AKKUR fyrir 2027 er gert ráð fyrir “neikvæðri samlegð” í þóknanatekjum upp á 1.000mkr. Kostnaðarsamlegð er metin 2.500mkr eða um 60% af kostnaði Skaga fyrir utan rekstrarkostnað VÍS og kemur inn að fullu leyti á árinu, gert er ráð fyrir að kostnaður við aðgerðir falli allur til á árinu 2026. Einnig er gert ráð fyrir samtals 500mkr samlegð í vaxtatekjum og í tryggingastarfsemi. Samlegð í hreinum vaxtatekjum er fyrst og fremst vegna hagstæðari fjármögnunar Íslandsbanka umfram Fossa.

Heildarsamlegð er því metin hér sem 2ma sem er í samræmi við það sem fram kom í tilkynningu félaganna um að þau vænti þess að samlegð verði á bilinu 1,8-2,4ma.

Að lokum er hér næmnitafla sem tekur saman helstu margfaldara m.v. forsendur að ofan og mismunandi gengi á bréfum Íslandsbanka. Allir útreikningar eru m.v. ProForma tölur og með samlegð þar sem við á.

Hér að neðan má sjá mat á sameinuðum efnahagi miðað við efnahag félaganna þann 30/6/25.

Það sem fjárfestar hafa líklega meiri áhuga á er hvaða áhrif þetta hefur á fjármögnun bankans og umfram eigið fé. Hér að neðan er gerð tilraun til að leggja mat á hvernig áhættuvegnar eignir og fjármögnun muni þróast.

Hér er gert ráð fyrir því að úthlutað eigið fé til tryggingastarfseminnar (VÍS) verði svipað og það er í dag hjá Skaga eða um 18ma. Sameinað félag mun að öllum líkindum geta beitt svokölluðu “Danish Compromise” ákvæði sem þýðir að eigið fé tryggingastarfseminnar verði flokkað sem fjárfesting með 250% áhættuvog. Hér að neðan kemur það inn í “Market risk” hlutann í REA töflunni, 250% af 18mö.

Þar sem markmið Íslandsbanka er að vera með CET1 eiginfjárhlutfall upp á 17,2% myndi VÍS því binda u.þ.b. 7,8ma í eigið fé en því til viðbótar verður öll viðskiptavild sem verður til vegna kaupanna dreginn frá eiginfjárgrunni.

Miðað við virði Skaga í viðskiptunum og bókfærðu eigin fé félagsins mun verða til u.þ.b. 19ma viðskiptavild við kaupin, spurningin er hvernig henni verður úthlutað milli VÍS, Fossa og ÍV.

Eins og sést í töflunni hér að ofan er umfram eigið fé Íslandsbanka metið um 36,5ma þann 30/6 sl., þegar fyrirhuguðum arðgreiðslum og endurkaupum er bætt við. Þegar mati á breytingum vegna innleiðingu CRR3 er bætt við eykst það í 48,6ma.

Mat á umfram eigin fé sameinaðs félags eykst þegar tekið er tillit til nýs hlutafjár, aukinnar viðskiptavildar og meðhöndlunar á eigin fé VÍS í áhættuvegnum eignum. Mat á heildar umfram eigin fé er um 56,1ma.

Án þess að fara of djúpt í tæknileg atriði þá má segja í kjölfar umræðu að ofan að heildar eigið fé sem mun þurfa að binda vegna vátryggingastarfsemi verður í kringum 26ma. Tæplega 8ma vegna REA og u.þ.b. 18ma vegna viðskiptavildar. Það þýðir að VÍS mun þurfa að búa til 2,6ma hagnað til að ná 10% arðsemi eiginfjár.

Undafarna 12 mánuði er afkoma vátryggingastarfsemi tæplega 2,5ma og gefum okkur að það verði svipað næstu misseri. VÍS er með 32ma skuldabréfa- og lausafjársafn og ef við gefum okkur að félagið nái 7,5% ávöxtun á það eru það 2,4ma. Hlutabréfasafnið er um 15ma og 10% ávöxtun af því skilar þá 1,5ma.

Heildartekjur, í eðlilegu árferði, erum því um 6,4ma. Rekstrarkostnaður vegna fjárfestingarstarfsemi er um 300mkr og fjármagnskostnaður vegna vátryggingasamninga er um 1,8ma. Hagnaður fyrir skatta er þá um 4,3ma og hagnaður eftir skatta um 3,7ma (enginn tekjuskattur af hagnaði hlutabréfa).

Í eðlilegu árferði ætti VÍS því að geta skilað vel yfir 10% arðsemi eiginfjár inni í samstæðunni og líklega um og yfir 14%.

Ef sameinað félag vill minnka eiginfjárbindingu vegna tryggingastarfsemi getur félagið farið í aðgerðir til að draga úr markaðsáhættu VÍS sem hefur í dag mestu áhrifin á eiginfjárkröfu VÍS. Það væri t.d. hægt að gera með því að draga út hlutabréfaáhættu, auka vægi ríkisskuldabréf og reyna að hafa líftíma skuldabréfasafnsins eins nálægt líftíma skuldbindingar tryggingastarfseminnar og hægt er.

Hér að neðan má sjá hvernig hluthafalisti sameinaðs félags kæmi til með að líta út miðað við samsetningu í dag.

Eins og sjá má verða bæði Sjávarsýn og Skel fjárfestingafélag meðal stærstu hluthafa sameinaðs félags og ásýnd hluthafalista Íslandsbanka breytist þar með töluvert.