Kvika - Endurkaup og erlend útgáfa

Frá því að Kvika birti uppgjör fyrir fyrsta ársfjórðung hefur bankinn bæði tilkynnt um nýja endurkaupaáætlun og fyrstu erlendu útgáfu sína í Evrum.

Endurkaupaáætlun

Endurkaupaáætlun mun nema allt að 2,5mö.kr. sem nemur um 3,6% af útistandi bréfum bankans miðað við dagslokagengi föstudaginn sl. Skv. áætlun má bankinn kaupa að hámarki 6,9m hluti á dag sem eru rúmlega 100m.kr. m.v. núverandi gengi. Verði heimildin fullnýtt á hverjum degi mun það taka 24 daga fyrir áætlunina að klárast.

Erlend fjármögnun

Á föstudaginn sl. tilkynnti bankinn um sína fyrstu erlendu skuldabréfaútgáfu í Evrum. Bankinn gaf út 200m EUR á 4,5% vöxtum sem ígildir 2,5% álagi ofan á millibankavexti. Heildareftirspurn var yfir 350m EUR og í ljósi þess að þetta var frumútgáfu bankans í Evrum er líklegt að næsta útgáfa verði á betri kjörum að öðru óbreyttu.

Til þess að setja þetta í samhengi er hægt að horfa til þess að bankinn er með erlendar skuldbindingar í GBP, sem tengjast að stóru leyti Ortus, upp á rúmlega 16ma.kr. í lok fyrsta ársfjórðungs eða tæplega 100m GBP. Ef við gefum okkur að þessi erlenda útgáfa verði nýtt til að greiða upp fjármögnun Ortus sem liggur fyrir að er á töluvert verri kjörum er hægt að leggja mat á áhrifin.

Þar sem ekki liggur fyrir hver kjörin eru á núverandi fjármögnun þarf að gefa sér ýmsar forsendur. Bankinn hefur sögulega, þar til á þessu ári, verið að gefa út erlend skuldabréf á u.þ.b. 4,0% álagi á millibankavexti og þá aðallega í sænskum og norskum krónum. Ef við gefum okkur að fjármögnun Ortus sé á svipuðum slóðum þýðir það lækkun um 1-2%-stig.

1,0%-stigs lækkun á GBP skuldir Kviku þýðir lækkun á vaxtakostnaði um u.þ.b. 160m.kr. á ársgrundvelli, ef þessi útgáfa verður að fullu nýtt til að greiða upp núverandi fjármögnun mætti því gefa sér að sparnaður verði á bilinu 150-400m.kr. á ársgrundvelli en bankinn var 9,7ma.kr. í hreinar vaxtatekjur árið 2024 og spá AKKUR fyrir 2025 hljóðaði upp á 11,5ma.kr.

Annar punktur varðandi erlenda fjármögnun Kviku er að fyrr á þessu ári gaf bankinn út skuldabréf í norskum og sænskum krónum. Bankinn hefur oft gefið út skuldabréf í þessum myntum áður en kjörin sem bankinn fékk í janúar sl. voru þau bestu sem bankanum hefur boðist eða 2% álag á millibankavexti.

Aðrar útgáfur í SEK og NOK sem voru útistandandi í lok fyrsta ársfjórðungs voru á 4,0-4,1% álagi ofan á millibankavexti. Þessar útgáfur námu um 23,6mö.kr. og það má því gefa sér að ef bankinn heldur áfram að gefa út á 2% álagi mun sparnaðurinn sem hlýst af því verða tæplega 500m.kr. á ársgrundvelli.