VIÐBRÖGÐIN VORU SEND TIL ÁSKRIFENDA Í GÆRKVÖLDI OG ERU BIRT OPINBERLEGA NÚNA - NEÐANGREINT MIÐAST VIÐ ÞÆR UPPLÝSINGAR SEM LÁGU FYRIR KVÖLDIÐ 30. JÚLÍ 2025.
Jákvætt:
Vaxtatekjur langt umfram væntingar
Rekstrarkostnaður töluvert undir væntingum
Fjármunatekjur umfram væntingar
Verðmæti í Landey færð upp
Neikvætt:
Rekstur Varðar aðeins undir væntingum
Arion banki birti uppgjör fyrir annan ársfjórðung 2025 fyrr í dag eftir að hafa birt jákvæða afkomuviðvörun þann 15. júlí sl. Eins og kom fram í viðbrögðum við afkomuviðvörun var hagnaður langt umfram væntingar. Afkomuviðvörunin gaf einungis til kynna stóru myndina en eftir að hafa skoðað uppgjörið sjálft er ljóst að undirliggjandi rekstur er gríðarsterkur og töluvert umfram væntingar.
Hér að neðan má sjá samantekt á uppgjöri bankans borið saman við spá AKKUR og meðaltal greiningaraðila.
Eins og sést á þessari samantekt eru hreinar vaxtatekjur langt umfram væntingar auk þess sem rekstrarkostnaður er töluvert lægri. Undirliggjandi hagnaður, þ.e.a.s. kjarnatekjur að frádregnum rekstrarkostnaði, er langt umfram væntingar eða um 2,4mö umfram væntingar AKKUR.
Hreinar fjármunatekjur eru yfir væntingum en AKKUR kýs að leggja ekki mikla áherslu á þennan sveiflukennda lið.
Hrein virðisbreyting var einnig lægri en væntingar AKKUR en líkt og áður hefur komið fram er ekki reynt að spá sérstaklega fyrir um sveiflur hér og gert ráð fyrir að virðisrýrnun sé u.þ.b. 0,25% út spátímabilið á ári. Líkt og áður hefur verið bent á telur AKKUR að bankinn eigi inni bakfærslu á virðisrýrnun undanfarinna ára en lætur það eiga sig að reyna að spá fyrir um hvenær og í hversu miklu magni það gerist. Mat AKKUR er að virðisrýrnun sé “ofmetin” um 1-2ma.
Ljóst er eftir tvö sterk uppgjör á þessu ári að undirliggjandi rekstur bankans er töluvert sterkari en AKKUR hefur gert ráð fyrir undanfarið og að horfur til næstu missera verða hækkaðar.
Jákvæðir punktar
Hreinar vaxtatekjur eru langt umfram væntingar og vaxtamunur töluvert hærri. Hreinar vaxtatekjur á einum ársfjórðungi hafa aldrei verið hærri. Fyrsti ársfjórðungur var sá besti hingað til þegar hreinar vaxtatekjur voru 12,1ma en hreinar vaxtatekjur á öðrum ársfjórðungi námu 14,2mö eða tæplega 17% hærri en á fyrsta ársfjórðung! Markaðurinn hafði áhyggjur af vaxtamun og að hann myndi minnka með lækkandi verðbólgu en vaxtamunur á síðasta ársfjórðung var líklega sá mesti í sögu bankans, a.m.k. frá 2017. Bankinn stendur við sitt markmið að vaxtamunur verði í kringum 3% næstu misseri en mat AKKUR er að vaxtamunur fyrir árið í heild verði meiri en í fyrra. Hér er vert að benda á frumvarp um kílómetragjald og hvaða áhrif það getur haft á vísitölu neysluverðs en það verður skoðað betur við tækifæri.
Rekstrarkostnaður rúmlega 650m undir væntingum AKKUR og eykst um 2,0% á milli ára leiðrétt fyrir stjórnvaldssekt í fyrra. Kostnaðarhlutfall (af kjarnatekjum) lækkar um 9,6%-stig milli ára.
Hreinar fjármunatekjur voru töluvert yfir væntingum AKKUR. Líkt og áður leggur AKKUR ekki mikla áherslu á fjármunatekjur þar sem þetta er mjög sveiflukenndur liður og meiri áhersla er lögð á kjarnareksturinn.
Verðmæti Landey er fært upp um tæplega 1,8ma. Búið er að setja Arnarland í söluferli og ætti raunverulegt virði þess aða skýrast á næstu 1-2 ársfjórðungum.
Neikvæðir punktar
Eftir góðan gang hjá Verði undanfarin misseri var arðsemin undir væntingum AKKUR. Því skal haldið til haga að fjórðungurinn var í sjálfu sér góður en væntingarnar voru orðnar (of) háar.
Niðurstaða
Gríðarlega sterkt uppgjör sem var langt umfram væntingar. Það er ljóst að AKKUR mun endurskoða horfur fyrir næstu misseri upp á við þar sem að undirliggjandi rekstur er sterkari en gert var ráð fyrir.
Verðlagning
Miðað við dagslokagengi í dag er markaðsvirði bankans 244ma. að teknu tilliti til eigin bréfa sem þýðir að hann er metinn á 7,6x hagnað (hluthafa bankans) síðustu tólf mánaða og P/B hlutfallið 1,21x