Arion banki - Stutt samantekt

Líkt og komið hefur fram áður hyggst AKKUR ekki uppfæra verðmöt með reglubundnu millibili, t.d. eftir hvert ársfjórðungsuppgjör, heldur bara þegar ástæða þykir til. Það gæti þá verið sökum þess að framtíðarhorfur breytast verulega, ýmist til betri eða verri vegar.

Frá því að Frumskýrsla um Arion banka kom út í desember síðastliðnum hafa framtíðarhorfur bankans breyst töluvert til hins betra, hins vegar verður verðmat ekki uppfært að sinni en þess í stað send stutt samantekt um verðlagningu og samanburð á nýjust afkomuspá við Frumskýrslu.

Hærri vaxtatekjur stafa bæði af sterkari vaxtamun en gert var ráð fyrir auk þess sem útlánavöxtur hefur verið meiri.

Tryggingastarfsemi hefur verið sterkari og komið var inn í Frumskýrslu að spáin væri undir markmiðum stjórnenda. Ef þeim tækist að ná markmiðum væri ljóst að afkoman yrði töluvert betri sem er raunin. Hins vegar er spáin fram á veginn ennþá undir væntingum stjórnenda og getur verið að nauðsynlegt verði að hækka hana aftur.

Bankinn hefur náð góðum tökum á rekstrarkostnaði og hefur spáin verið lækkuð töluvert fram á veginn.

Þetta skilar sér í breytingu á afkomuspá upp á 2-5ma á ári líkt og taflan sýnir.

Arion banki hefur núna sjaldan verið jafn ódýr á V/H mælikvarða, núverandi verðlagning er á pari við verðlagningu í mesta svartnættinu í COVID.

Einhverjir gætu bent á að þegar verið er að horfa á hagnað síðustu 12 mánaða séu einskiptisliðir þar sem vega til hækkunar, t.d. frekar lág virðisrýrnun og uppfært mat á Arnarlandi.

Hér að neðan má sjá sömu mynd nema hér er verið að horfa á “Undirliggjandi hagnað fyrir skatt”. Þ.e.a.s. hér er aðeins um að ræða kjarnatekjur (vaxtatekjur, þóknanatekjur og tekjur af tryggingum) að frádregnum rekstrarkostnaði. Hér er því búið að taka alla sveiflukennda liði sem bankinn hefur enga stjórn á út úr myndinni. Þessi mynd segir okkur sömu sögu, bankinn hefur sjaldan verið ódýrari.

AKKUR lagði fram könnun í síðustu viku til að kanna hversu mikil verðmæti lesendur teldust leynast í Blikastaðalandi.

Eftir á að hyggja hefði könnunin þurft að bjóða upp á fleiri valmöguleika en þeir voru frá 0ma til 40ma á 5ma fresti og svo að lokum “Meira en 40ma”. Flestir þáttakenda kusu meira en 40ma.

Ef gert er ráð fyrir að “Meira” séu 45ma er meðaltal könnunar 33,2ma. Ástæðan fyrir því að könnunin var lögð fram var til að setja niðurstöðuna í samhengi við verðlagningu bankans. Bankinn er í dag metinn á 246ma og m.v. þessa niðurstöðu eru 33ma af því Blikastaðir. Það má því segja að bankinn sjálfur sé metinn á 213ma og hægt að leiðrétta margfaldara fyrir því. P/B er í dag 1,22x en leiðrétt fyrir Blikastöðum (m.v. 33,2ma) er P/B margfaldarinn 1,06x.

Að lokum er smá samanburður á verðlagningu íslensku bankanna við stærstu banka Norðurlandanna. Það má vel færa rök fyrir því að íslenskur bankar eigi að vera ódýrari en stærstu bankar Norðurlandanna en munurinn er fullmikill.

Þegar P/B verðlagning er sett í samhengi við ROE má sjá að íslensku bankarnir (grænu punktarnir) eru allir langt undir öðrum bönkum með sambærilega arðsemi.