Íslandsbanki vill líka sameinast Kviku

Eftir lokun markaða þriðjudaginn 27. maí lýsti Arion banki yfir áhuga sínum að ganga til viðræðna við Kviku banka um samruna bankanna tveggja. Morgunin eftir, eða fyrir opnun markaða miðvikudaginn 28. maí, lýsti Íslandsbanki sömuleiðis yfir áhuga að gang til viðræðna um samruna.

Hér að neðan má sjá fyrstu viðbrögð AKKUR við fréttunum en við má búast að það verði meiri umfjöllun á næstunni.

Ólíkt því sem væri uppi á teningunum hjá Arion að það er líklegt að sameinaður banki Íslandsbanka og Kviku þyrfti ekki að selja frá sér eignastýringarstarfsemi. Hins vegar verður að teljast líklegt að Samkeppniseftirlitið (SKE) myndi setja félögunum skilyrði varðandi tækjafjármögnun og að Ergo og Lykill fái ekki að sameinast. Koma verður í ljós hvort að SKE vilji undanskilja fleiri hluta rekstursins.

Hér að neðan verður horft framhjá þessum pælingum að svo stöddu og gert ráð fyrir sameiningu bankanna eins og þeir líta út í dag. Reynt verður að draga upp einhverjar aðrar sviðsmyndir síðar.

Hér er aðeins verið að endurvinna umfjöllun um mögulegan samruna Arion banka og Kviku. Að mati AKKUR eru samlegðartækifærin mjög svipuð milli Arion banka og Kviku annars vegar og Íslandsbanka og Kviku hins vegar við fyrstu sýn. Það gæti breyst ef/þegar aðrar sviðsmyndir verða skoðaðar þar sem t.d. þarf að selja frá sér eignastýringu o.s.frv.

Í stað þess að finna upp hjólið er lesendum bent á umfjöllun um Arion banka og Kviku en þess í stað eru settar inn nokkrar uppfærðar myndir hér að neðan til að setja hlutina í samhengi. Forsendur á bakvið útreikninga eru svipaðar eða þær sömu og í tilfelli Arion banka og Kviku.

Hér má nálgast umfjöllun um mögulegan samruna Arion banka og Kviku þar sem farið er betur yfir forsendur.

Hér að neðan má sjá mjög gróf drög að því hvernig sameinaður banki gæti litið út miðað við spá AKKUR fyrir árið 2025 og mati á samlegð. Afkomuspá fyrir Íslandsbanka var uppfærð eftur uppgjör fyrsta ársfjórðungs fyrir útboð á meðan afkomuspá Kviku var gefin út fyrir uppgjör fyrsta ársfjórðungs og á eftir að endurskoða.

Vert er að benda á að V/H hlutföllin á myndinni hér að neðan byggja á dagslokagengi bankanna í lok dagsins í dag, 28. maí, og ekki er sett neitt álag á gengi Kviku.

Hér er ekki búið að taka tillit til þess að mögulega þyrftu bankarnir að selja einhverja starfsemi frá sér sem gæti breytt myndinni að einhverju leyti.

Það má færa rök fyrir því að það getur komið fram “neikvæð samlegð” í þóknanatekjum. Sem dæmi geta þóknanatekjur í verðbréfamiðlun og fyrirtækjaráðgjöf dregist saman í sameinuðum banka t.d. þar sem viðskiptin þar eru meira bundnar við starfsfólkið heldur en t.d. lánastarfsemi.

Sameinaður banki er klárlega meira virði heldur í sitthvoru lagi. Það er því hluthöfum beggja banka til hagsbóta að samruninn eigi sér stað. Báðir bankar eru undirverðlagðir að mati AKKUR en stjórnendur Íslandsbanka opna á að greiða 10% álag á gengi Kviku og að viðskiptin gætu verið blanda af hlutabréfum í Íslandsbanka og reiðufé.

Miðað við hluthafalista bankanna í dag yrði ekki mikil breyting á samsetningu hluthafahópsins þar stærstu hluthafar beggja banka eru mikið til sömu aðilarnir.

Þar sem mat á samlegð er það sama og í tilfelli Arion banka er virðisaukningin sú sama eða í kringum 60makr. sem væri að mestu leyti að renna til lífeyrissjóða sem eru langstærstu hluthafar beggja banka.

Hér að neðan má sjá hvernig hluthafalisti sameinaðs banka gæti litið nokkurn veginn út miðað við stöðu þeirra í dag byggt á nýjustu upplýsingum um hluthafa á heimasíðum bankanna. Íslandsbanki er í mun dreifðari eigu en bæði Arion banki og Kvika eftir nýafstaðið útboð sem sést helst á því að stærstu eigendur skv. þessum lista ættu rúmlega 45% hlut samanborið við 65% hlut í tilfelli Arion banka og Kviku.

AKKUR telur góðar líkur á að samruninn fái fram að ganga en óvissan snýr að tímalínu og hvaða skilyrðum samruninn yrði háður. Mögulega þyrfti sameinaður banki að selja frá sér einhvern hluta starfseminnar, augljósa málið er tækjafjármögnun en stóra spurningin er hvort SKE fetti fingur út í fleiri atriði.